உள்ளடக்கம்

பாட்டி : “பசங்களா, பிறரைக் காயப்படுத்தக் கூடாது என்பதைப் பற்றி தாத்தா உங்களுக்கு சென்ற பாடத்தில் கற்பித்தார். இப்பொழுது மூத்தோரை மதிப்போம் என்பதனை இப்பாடத்தில் கற்கலாம்”

நவீன் : “சரி பாட்டி நாங்கள் கற்றுக்கொள்ள ஆர்வமாக இருக்கிறோம்”

மீனா : “ஆமா பாட்டி”

பாட்டி : “என் பேரப்பிள்ளைகளின் ஆர்வத்திற்கு பாராட்டுக்கள். சரி பாடத்திற்குள் நுழையலாம். மூத்தோர் என்பவர்கள் யார் என்று நவீன் சொல்லுங்கள்”

நவீன் : “நம்மை விட வயதில் பெரியவர்களை மூத்தோர் என்போம். அவர்களிடம் நிறைய அனுபவங்கள் இருக்கும். அவர்களிடமிருந்து பல நல்ல விஷயங்களைக் கற்றுக் கொள்ள முடியும்”

பாட்டி : “நவீனின் பதில் சரியானது. உங்களுக்கு தெரிந்த மூத்தோர்கள் ஐவரை மேகனா கூறுங்கள்”

மேகனா : “அம்மா, அப்பா, ஆசிரியர்கள், தாத்தா, பாட்டி”

பாட்டி : “சரியான பதில் மேகனா.”

மேகனா : “சரி பாட்டி. நன்றி!”

பாட்டி : “மூத்தோர்களை எவ்வாறு மதிக்க வேண்டும் என்பதைக் கூறுகிறேன் கவனமாகக் கேளுங்கள்.

• உங்களிடம் உதவிகள் கேட்கும் போது மறுக்காமல் செய்து கொடுங்கள்.
• பேருந்தில் பயணிக்கும் போது வயதானவர்கள், கர்ப்பிணித்தாய்மார்கள், ஊனமுற்றோர் போன்றவர்களைக் கண்டால் உங்களது இருக்கையை அவர்களுக்கு கொடுங்கள்.
• அத்துடன் வங்கி, கடை, மருத்துவமனை போன்ற பொது இடங்களில் தங்களது தேவைகளுக்காக இவர்கள் காத்திருப்பதைக் கண்டால் உங்களால் இயன்றவரை முன்னுரிமை அளியுங்கள்.
• அவர்களுடன் மரியாதையாக இன்முகத்துடன் பேசுங்கள்.
• விருந்தினர்களாக நம் வீட்டுக்கு வருகை தரும் மூத்தோர்களை இன்முகத்துடன் வரவேற்று உபசரியுங்கள்.
• மூத்தோர் சொல்வதைக் கேளுங்கள். நீங்கள் அவர்களால் நேசிக்கப்படுவீர்கள்.
• அவர்களிடம் பணிவாக நடந்து கொள்ளுங்கள்.
• அவர்களிடம் தீயதைக் கேட்டு அடம்பிடிக்காதீர்கள். ஏனென்றால் அவர்கள் நமது நலன் கருதியே சொல்கிறார்கள்.
• பெற்றோர்களின் வருமானத்திற்கு மீறி பொருட்களை வாங்கித் தர சொல்லி கேட்காதீர்கள். பல சிறுவர்களுக்கு ஒருவேளை உணவு கூட கிடைப்பதில்லை என்பதை நினைவில் கொள்ளுங்கள்.
• மூத்தோர் மனம் புண்புடும் வார்த்தைகளைப் பிரயோகிக்காதீர்கள்.
• உங்கள் வீட்டிலுள்ள மூத்தோர்களுடன் பேசுவதற்கு நேரம் ஒதுக்குங்கள்.
• உங்களுக்கு தெரியாதவற்றை அவர்களிடம் கேட்டு அறிந்து கொள்ளுங்கள்.
• மூத்தோருக்கு இரக்கம் காட்டுங்கள்.

இவற்றை பின்பற்றி மூத்தோரை மதித்து நடப்போம். இதன் மூலம் அவர்களது அன்பையும் நற்பிரார்த்தனைகளையும் பெறலாம்.”

நவீன், மேகனா, மீனா : “பாட்டி, நிச்சயமாக நாங்கள் மூத்தோரை மதிப்போம்”

சுருக்கம்

நம்மை விட வயதில் மூத்தோர்களை மதிப்பது நமது கடமையாகும். அவர்களை எவ்வாறு மதிக்கலாம் என்பது பற்றி இப்பாடத்தில் கூறப்பட்டுள்ளது. ஆகவே அதனைப் பின்பற்றி அவர்களின் அன்பைப் பெறுவோம்!