உள்ளடக்கம்

கண்ணனின் அப்பாவும், அம்மாவும் வீட்டைச் சுத்தம் செய்து கொண்டிருந்தார்கள். அவர்களுக்கு கண்ணனும் யாழினியும் உதவிக் கொண்டிருந்தார்கள்.

யாழினி : ‘‘அண்ணா, நாம கதவை மூடி வைத்திருந்தாலும் எப்படி வீட்டிற்குள் தூசு வருகிறது?’’

கண்ணன் : ‘‘மண்ணிலிருந்து வெளிப்படும் புழுதியானது காற்றினால் பரவக்கூடியது. புழுதி என்பது அளவில் மிகச் சிறியது. மிகச்சிறிய துகள்கள் போன்றது. காற்று எல்லா இடத்திலும் உட்புகக்கூடியது என்பதால், அது எளிதாக சிறு துவாரத்தின் மூலமும் கூட தூசினை வீட்டிற்குள் கொண்டு வந்து விடுகிறது.’’

யாழினி : “அண்ணா, நாம் வீட்டை சுத்தம் பண்ணும் போது எவற்றையெல்லாம் சுத்தம் பண்ணனும்னு சொல்லிக் கொடுக்குறீர்களா?’’

கண்ணன் : ‘‘நானும் இன்று தான் முதல் தடவை செய்கிறேன் யாழினி. அப்பா, அம்மாவை பார்த்து கத்துக்கலாம்’’

யாழினி : ‘‘சரிங்க அண்ணா’’

அப்பா : ‘‘உங்க இரண்டு பேருக்கும் நானும் அம்மாவும் கற்றுத் தருகிறோம்.’’

அம்மா : ‘‘நான் இப்போ சொல்லித் தருவது வீட்டிற்கு மட்டுமில்லை பொது இடங்களுக்கும் பொருந்தும்.

• வீட்டில் அல்லது பொது இடங்களில் காணக்கூடிய அனைத்து நுழைவாயில்கள், படிக்கட்டுக்கள், வெளியேறும் பகுதிகளில் காணப்படும் தூசுக்கள், நம் கால்களுக்கு மிதிப்பட்டு வந்த மண் மற்றும் பிற குப்பைகள் நீக்குவதற்கு அவ்விடங்களை முதலில் பெருக்க வேண்டும்.
• தினமும் காலையில் குப்பைத்தொட்டிகளில் காணப்படும் குப்பைகளை அதிலிருந்து அகற்ற வேண்டும்.
• குப்பைகளை இடுவதற்காக என்று நியமிக்கப்படுள்ள இடங்களில் குப்பைகளை இட வேண்டும்.
• வீட்டில் அல்லது பொது இடங்களில் காணப்படும் அனைத்து ஜன்னல்கள், சுவரின் விளிம்புகள், நாற்காலிகள், மேசைகள், கோப்புக்கள் அடங்கிய பெட்டிகள் (File Holder – பைல் ஹோல்டர்), பொருட்கள் அடங்கிய பெட்டிகள், வெறும் பெட்டிகள், கண்ணாடிகள், பிற பர்னிச்சர்கள் மற்றும் கதவுகளில் தூசு படிந்திருக்கும். ஆகவே அவற்றையும் கட்டாயம் சுத்தம் செய்ய வேண்டும்.
• மாடி வீடுகள், அடுக்குமாடிக் கட்டடங்கள், நிறுவனங்களில் படிக்கட்டுக்கு பதிலாக லிப்ட்
  பயன்படுத்துவார்கள். இவ்வாறான பொது இடங்களில் மக்கள் நடமாட்டம் அதிகம். ஆகவே
  விரைவிலே அசுத்தமாகி விடும். அதனால் தினசரி அதனை சுத்தம் செய்வது சிறந்தது
• கழிவறைகளை சுத்தமாக வைத்திருக்க வேண்டும். அத்துடன் தினசரி கழிவறையை பயன்படுத்தும் போது கழிவறைச் சுத்தத்தை பேணுதல் அவசியமாகும்.
• படுக்கையறை, சமையலறை, மற்ற அறைகளையும் சுத்தம் செய்ய வேண்டும்.
• தரை விரிப்புக்கள், அலங்கார சீலைகளையும் வாரத்திற்கு ஒரு முறையாவது கழுவி சுத்தமாக வைத்திருப்பது ஆரோக்கியமானதாகும்.

இவ்வாறு தான் நம் வீட்டின் சுத்தத்தையும் பொது இடங்களின் சுத்தத்தையும் பேண வேண்டும்.’’

அப்பா : ‘‘ஆமா, அம்மா சொல்வது சரி. அதுமட்டுமல்லாமல்.

• பொது இடங்களில் துப்பக் கூடாது. குப்பைகளை வீசக்கூடாது.
• கழிவறையாக பாதைகளை பயன்படுத்தக் கூடாது.
• வீட்டுச் சுத்தம் தினசரி பேணப்பட துடைப்பம் மூலம் வீட்டை பெருக்கி விட்டு வீட்டை துடைக்கலாம்.
• தேவையற்ற பொருட்களை அகற்ற வேண்டும்.
• நாம் பயன்படுத்தும் பாத்திரங்களை கழுவிய பின்னரே பயன்படுத்த வேண்டும்.
• அத்துடன் பொருட்களை உரிய இடத்தில் வைக்க வேண்டும்.
• வீடுகளில் சிலந்தி வலைகள் காணப்பட்டால், அதனை நீக்க வேண்டும்.

இவற்றையெல்லாம் செய்தால் நிச்சயமாக ஒவ்வொரு வீடும் பொது இடங்களும் அழகாகவும் சுத்தமாகவும் இருக்கும். புரிகிறதா?’’

கண்ணன், யாழினி : ‘‘ஆமாம் அப்பா’’

அப்பா : ‘‘இப்போ நம்ம வீட்டை சுத்தம் பண்ணலாமா?’’

கண்ணன், யாழினி : ‘‘கண்டிப்பாக அப்பா’’

சுருக்கம்

வீடுகள் மற்றும் பொது இடங்கள் விரைவாக அசுத்தமடையக் கூடிய இடங்களாகும். காற்றினால் பரவும் புழுதியினால் ஜன்னல்கள், நுழைவாயில்கள், மற்றும் அனைத்து மரச்சாமான்களும் தூசு படிந்து விடுவதால், தினமும் அவற்றை துடைத்து சுத்தம் செய்வது நமது கடமையாகும்.