உள்ளடக்கம்

நந்து மாமா மாலை நேர தேநீரை அருந்திக் கொண்டிருந்தார். அந்த சமயத்தில் தன்னுடைய தேநீரை எடுத்துக் கொண்டு நந்து மாமாவின் பக்கத்தில் அமர்ந்தான் கேசவ்.

கேசவ் : “மாமா போக்குவரத்து விதிகளில் 108 ஆம்புலன்ஸ் பற்றியும் பாதையில் அதனைக் கண்டால் பின்பற்ற வேண்டிய போக்குவரத்து விதிகளையும் சொல்லித் தருகிறீர்களா?”

நந்து மாமா : “சாப்பிடும் போது பேசக்கூடாது கேசவ். தேநீர் அருந்தியதும் கூறுகிறேன்”

கேசவ் : “சரி மாமா. மன்னிக்கவும்”

(நந்து மாமா மற்றும் கேசவ் தேநீர் அருந்திவிட்டு 108 ஆம்புலன்ஸை பாதையில் கண்டால் பின்பற்ற வேண்டிய சாலை விதிகளைப் பற்றி உரையாடத் தொடங்கினர். வாருங்கள் நாமும் அவற்றை கற்கலாம்.)

நந்து மாமா : “கேசவ், 108 ஆம்புலன்ஸ் என்பது அவசர சிகிச்சைக்காக வேண்டி நோயாளிகளைக் கொண்டு செல்லும் வண்டியாகும். இதை மருத்துவ அவசர ஊர்தி என்று தமிழில் கூறுகிறோம். வெள்ளை நிறத்தில் காணப்படும் அவ்வண்டி வருவதனைத் தெரியப்படுத்த வண்டியில் விளக்கு ஒளிர்வதுடன் சைரன் ஒலியும் இடை விடாது ஒலித்துக் கொண்டே செல்லும். இது அவசர நிலையை தெரிவிப்பதாகும். இதனைக் கேட்கும் போது அது வெறும் வாகனத்தின் ஒலியல்ல. உள்ளே இருப்பது ஓர் துடிக்கும் உயிர் என்பதை உணர வேண்டும்.

ஆம்புலன்ஸ் 108 வழங்கும் சேவைகள் :

• அவசர மருத்துவ உதவி தேவைப்படும் எவராக இருந்தாலும் 108 அவசர மருத்துவ ஊர்தி சேவையைப் பெறலாம்.
• உதவி தேவைப்படுவோர் தாம் இருக்கும் இடத்திலிருந்தே அழைத்ததும் அந்த இடத்திற்கு 108 ஆம்புலன்ஸ் நேரடியாக வந்து விடும்.
• அதில் இருக்கும் மருத்துவக் குழுவினர் முதலுதவி அளித்து அருகில் இருக்கும் மருத்துவமனைக்கு அழைத்துச் செல்வார்கள்.
• அருகில் இருப்பது தனியார் மருத்துவமனையாகவும் இருக்கலாம், அரசு மருத்துவமனையாகவும் இருக்கலாம்.
• எந்த மருத்துவமனை என்பதை மருத்துவ உதவி தேவைப்படுவோரே தேர்ந்தெடுக்கலாம்.
• ஏற்கனவே தனியார் மருத்துவமனையில் சிகிச்சை பெற்று வரும் ஒருவர் அதே மருத்துவமனைக்கு கொண்டு செல்ல 108 ஆம்புலன்ஸ் சேவையைப் பயன்படுத்த முடியாது.
• ஒருவேளை தனியார் மருத்துவமனையில் சேர்க்கப்பட்டிருக்கும் ஒருவர் அவசர சிகிச்சைக்காக அரசு மருத்துவமனைக்கோ அல்லது வேறொரு தனியார் மருத்துவமனைக்கோ கொண்டு செல்ல 108 ஆம்புலன்ஸ் சேவையை அணுக முடியாது.
• ஆனால், அப்போது நோயாளிக்கு சிகிச்சையளிக்கும் தனியார் மருத்துவமனையின் மருத்துவர் நேரடியாக 108 சேவையை அணுகலாம்.
• அதே நேரத்தில் குழந்தைகளுக்கும், கர்ப்பிணிகளுக்கும் அவசரத் தேவையென்றால் அவர்கள் எந்த மருத்துமனையில் இருந்தாலும் 108 சேவை வழங்கப்படும்.”

கேசவ் : “ஒரு பாதசாரியாக மற்றும் ஓட்டுனராக ஆம்புலன்ஸைக் கண்டால் என்ன செய்ய வேண்டும் மாமா?”

நந்து மாமா : “நல்லதொரு கேள்வி. மருத்துவ அவசர ஊர்தியைக் காணும் போது ஒரு வாகனத்தின் ஓட்டுனர் பின்பற்ற வேண்டிய போக்குவரத்து விதிமுறைகள் கீழ்வருமாறு :

• ஆம்புலன்ஸ் வருவதைக் கண்டு பதற்றமடையாமல் ஆம்புலன்ஸ் நாம் சென்று கொண்டிருக்கும் திசைக்கு எந்த பக்கமிருந்து வருகிறது என்பதை கவனிக்க வேண்டும்.
• நாம் செலுத்திக் கொண்டிருக்கும் வாகனத்தின் பின்னால் ஆம்புலன்ஸ் வண்டி வந்துக் கொண்டிருந்தால் நம் வாகனத்தை பாதுகாப்பாக இடது பக்கம் கொண்டு செல்ல வேண்டும்.
• நாம் செலுத்திக் கொண்டிருக்கும் வாகனத்தின் முன்னால் ஆம்புலன்ஸ் வண்டி வந்துக் கொண்டிருந்தால் நம் வாகனத்தை பாதுகாப்பாக வலது பக்கம் கொண்டு செல்ல வேண்டும்.
• இவ்வாறு வாகனத்தைக் கொண்டு செல்லும் போது பின்னால் வேறு வாகனங்கள் வருகிறதா? என்பதையும் பார்த்து வாகனத்தை பாதுகாப்பான முறையில் கொண்டு செல்ல வேண்டும். இவற்றை கவனிக்காமல் விரைவாக இடம் மாறினால் பின்னால் அல்லது முன்னால் வரும் வாகனத்தில் உங்களது வாகனம் மோதுவதற்கு வாய்ப்புள்ளது.
• இவ்வாறு இடது அல்லது வலது பக்கத்திற்கு உங்கள் வாகனத்தை கொண்டு செல்வது பாதுகாப்பில்லை எனும் பட்சத்தில் நீங்கள் இருக்கும் இடத்தில் வாகனத்தின் வேகத்தை வெகுவாக குறைத்து விடுங்கள் அல்லது அங்கேயே வாகனத்தை நிறுத்தி விடுங்கள். இதனால் நிலை புரிந்து ஆம்புலன்ஸ் உங்கள் வண்டியைக் கடந்து செல்லும்.
• இந்த நேரத்தில் நீங்கள் வேறொரு வண்டியைக் கடந்து செல்ல முயற்சிக்காதீர்கள். நீங்கள் செய்வதைப் பார்த்து மற்றவர்களும் அதனைப் பின்பற்ற முயற்சிப்பார்கள். இதனால் பெரிய விபத்துக்கள் ஏற்படலாம்.

அத்துடன் 108 அவசர மருத்துவ ஊர்தியைக் காணும் போது அது நம்மைக் கடந்து செல்லும் வரையில் பாதை மாறுவதற்கான சமிக்ஞை(Signal) காட்டப்பட்ட போதிலும் பாதசாரிகள் பாதை மாறக் கூடாது.

108 ஆம்புலன்ஸ் சேவைக்கு போலி அழைப்புக்களை மேற்கொள்பவர்கள்  ஒருவரின் இறப்புக்கு மறைமுகமான காரணியாகிறார். இவ்வாறான சமூக விரோத செயல்பாடுகளில் ஈடுபடக் கூடாது. உயிரைக் காக்கும் இந்த அவசர சேவைக்கு நாமும் நம்முடைய பங்களிப்பை 108 ஆம்புலனைஸ் வண்டியைக் காணும் போது வழங்குவோம்”

கேசவ் : “சரி. உங்களிடமிருந்து போக்குவரத்து விதிமுறைகளைக் கற்றுக் கொண்டேன். நன்றி நந்து மாமா!”

சுருக்கம்

108 ஆம்புலன்ஸ் என்பது அவசர மருத்துவ ஊர்தியாகும். இது அவசர சிகிச்சைக்காக நோயாளிகளைக் கொண்டு செல்கிறது. ஆகவே அவசர மருத்துவ ஊர்தியைக் காணும் பட்சத்தில் மேற்சொன்ன 108 ஆம்புலன்ஸ் சேவைக்கான போக்குவரத்து விதிகளைப் பின்பற்றி நடப்பதனால் ஓர் உயிரைக் காப்பாற்ற பங்களிப்போம்.